小記

（1）12月12日朗朗第一次去disneyland，大豐收
（2）12月11日第四次interview（由爸爸獨力帶領）
（3）12月5日朗朗第二次同朋友仔去大埔海濱公園，做追車黨，咩車都追
（4）11月29日第一次去數碼港睇日落…

好耐冇update喇

由於媽媽實在有十萬個忙的關係，真係好耐冇update下，今晚都係有好多野做，不過，想放過一下自己，就update下啦。

朗朗大個仔喇，終於在十三個月左右可以自己穩穩地走，其實都期待咗好耐……

在上兩個星期，佢去了九龍塘一間幼稚園面試，表現都ok，但結果都係不被取錄，雖然都未至於係我們好想入的學校，但都有少少失望同擔心，唔知會唔會冇學校收呢？我開始明白點解家長成日都打電話來發爛渣的原因（放心，我唔會），不過係唔好受的。

而家帶朗朗出街，見佢成日周圍行，四處睇，好得意，同埋見佢感受到外出的樂趣，覺得辛苦都係值得的。朗朗，爸爸、媽媽會繼續為你發掘一些好去處。

媽媽放暑假

由於媽媽太懶惰又太忙的關係, 今期由爸爸來 update 一下.

話說早前又在我們家開了個 baby gathering, 又是三個小朋友集合的時間. 小朋友玩得開心,大人食得開心.

上星期五我特意請假一天,一家三口到 Ocean Park 狂歡一天.開頭天陰陰幾好,下午陽光普照好熱.我們帶朗朗去參觀幾個館,包括水母,熊貓,中華鱘等等.當然我們是不知道他是否喜歡.不過似乎朗朗喜歡坐吊車,玩 merry-go-round. 玩完一日真的很累.

另外,媽媽放暑假半個月,朗朗而家已經回來九龍暫住.近幾天發覺朗朗又學了新的動作.無論於 physical or mental 方面都變得很快.有些名詞如爸爸,媽媽,食mum mum 等他好像似是聽懂了.拍手呀,擲波波呀,落床呀,爬上 sofa 呀全部都做到.重點是,每次入到 restaurant,無論是茶餐廳又好,中餐又好, 一坐低,朗朗都會馬上討吃.菜都未點他就知道又有好野食.........

雖然每天放工回家還要做家務真是很累,不過都是值得的.

下個月要交入學申請了,現在又要找一些音樂,英文班給他,看來爸媽都沒有停下來的一天了.

真的一歲了 - Birthday Actually

7 月 24 日，Antaresbaby 正式踏入一歲，成為“細個仔”。換句話說，下年就要正式入學啦。

由於近來天氣要不就是太熱，要不就是落雨，所以我同媽媽沒有帶 baby 出街慶祝。反之，我們決定於屋企開個大食會。

下午先有蘭姨及契媽等來探訪，她們大概六點左右離開。

而晚上的 party 加起來共有差不多二十人左右，困在五百多尺的屋內，雖然太迫，但也不失為一種熱鬧。

大家唱生日歌的時候，baby 突然狂笑大叫，兼手舞足蹈，簡直是 natural high 呀 - “如錢塘潮夜澎湃！” Afterall，其中我懷疑他是有意識地做出來的。

Baby 收到了很多利是同禮物，在此我代 baby 多謝各位親友的疼惜。這一代的孩子，大多都是被寵愛的。

爸爸媽媽當然是希望 baby 可以健健康康就夠了，同埋最好入到好一點的學校啦。

近來發現 baby 學習能力提升得很快，有很多動作，真的是教了一次便學識。做父母的看在眼裡，當然是欣喜萬分。

下年 baby 兩歲生日，有點想帶他去歐遊呢。

一歲喇

尋日，朗朗仔農曆生日，買了個小蛋糕同佢慶祝，為食的佢當然好鍾意食蛋糕啦，真係話咁快…朗朗，媽媽的所有願意都係大家身體健康，你的願意會唔會係大家都好似你個名咁心情開朗呢？

7月4日，朗朗第一次去九龍公園泳池游水，都ok開心，點知，第二日婆婆同姨姨帶佢去媽媽由細到大去慣的包玉剛，佢更開心，因為可以滑滑梯，一星期唁夠，朗朗第三次游水，呢次係去最多遊樂設施的彩虹泳池，雖然眼瞓，但佢都幾enjoy啦。

朗朗，媽媽近來有d心事呀，你感唔感受到呢？你要支持媽媽呀！

酷熱天氣下

朗朗出院個多星期，而家好得8899喇，於是爸爸、媽媽同姨姨就急不及待帶佢同陽光玩遊戲，雖然話同陽光玩遊戲，但大拿拿33度，又點可以在曬到正的時候出動呢，我們差不多等太陽下山，4點幾出發，5點幾到淺水灣，等下泊車，已經5：30多。放低野後，見臭豬因未瞓夠，心情麻麻咪諗住同佢玩下水，醒神下囉，點知…係唔work既，佢完全唔肯落地，結果坐下、攪下沙後，就歸家lu。

痊癒中…

臭豬終於在醫院住了三晚後，昨天出院喇，佢前後燒了五日，偶爾燒下都算，最怕就係燒到104度嘛，仲要見住平日active的佢竟然一日玩唔到一個鐘，成日都炆，又攰，過程中，大家都捱得好辛苦，今次又係趁爺爺出門旅行病病，真橋！

爸爸真慘

本來星期三已經想寫BLOG,但又因為個懶字,所以冇寫,要寫的原因係臭豬仔終於經歷了第一次剪髮,仲要係由爸爸、媽媽一齊合作完成的,過程不多於三分鐘，但足以令囝囝正經晒，哈哈！

星期五，爸爸媽媽下午放假，於是帶囝囝返屋企眠一眠，就向德福出發，諗住睇下有咩買啦，過程中，臭豬成日扭計，慢慢覺得唔對路，就懷疑佢病病，咪即刻返婆婆度攞藥，返到屋企探熱，101，TOO BAD,又發燒。

星期六，早上仍有燒，想BOOK醫生，點知睇開個個休息至29號，再搵第二個-FULL BOOKING，結果唯有繼續食藥，等星期日再睇醫生。下午，一直都係少少燒，到夜晚，竟然高到104，冇計，又要去醫院。

星期日係父親節，但同爸爸生日一樣，因為臭豬病病冇得慶祝，真係大整古，冇得出去事小，我們從未見過佢病成咁可憐的樣嘛，真令人擔心...爸爸真慘，生日要陪囝囝入醫院，父親節前夕，又要陪B仔睇急症，不過以後唔會架啦，我代BB同爸爸、爺爺、公公，仲有其他長輩爸爸講：父親節快樂！

加油

自從朗朗第一次在便盆wee wee之後，婆婆好有恆心，每日都比佢坐幾次，仲每次都坐幾至十分鐘，結果黃天不負有心人，佢在上星期開始有d進展喇，有一日更去了4次㖭，希望佢繼續努力啦。

學行方面，已停滯不前，自從佢開始爬得快之後，可能知道已可以周圍去，唔再學行，都唔知點算，正臭豬來架。

至於食野，佢依然有自己食野恐懼，不過我係唔會放棄，一定要想辦法幫下佢架，媽媽同你一齊加油！

好似中六合彩咁開心

本來近排媽媽既忙，又有dd煩，所以心情一般，但係今晚去探囝囝時遇上的一件事令我覺得好似中六合彩咁，好神奇！

話說我今晚去探朗朗途中，婆婆吩咐我要幫佢換片，於是，去到不久，我就準備同佢除褲，突然想起miss hau的便盆，就坐佢上去，佢初時好抗拒，我就諗住掩蓋比佢當椅子坐，都ok喎，於是我又進一步行動，我除埋佢條片，坐了一陣，見佢冇抗拒，就諗住扶佢起身著片，點知在呢個時候，奇蹟出現了，佢竟然痾緊wee wee呀，哈哈，你話係咪好似中六合彩咁…嗱，要記住個便盆係星期日先攞出來，咁快就比我撞到喇，好勁呀！就係咁，佢第一次成功在便盆wee wee，仲有呀，佢個攪笑豬，仲將我幫佢拉下到膝頭的褲仔烏低身除出來tim，雖然只係撞中，但都足以令我好開心！

update

嘩，爸爸、媽媽好懶呀！成個月冇update過囝囝的blog，係因為我們都太忙…

而家update下啦，小朗仲係得4隻牙上兩隻、下兩隻，我估快生第五、六、七隻啩。

爬，已經學識了，都幾快架，所以要成日望下佢去邊攪攪震。

行，仲學緊，扶住床邊或其他穩陣的物件就可以移動，哈哈，唔知幾時…不過，好似企穩了dd，可以維持站立姿勢約2秒。

食，係最麻煩的，唔知點解，佢咁抗拒自己拎餅入口，其他野佢又唔見佢怕，臭豬，咩都唔怕放入口食，話佢仲笑，但一叫佢拎餅就縮手，激死人。

講，發音多，在婆婆屋企好似識叫bu bu咁，有時食野叫“唔，唔”，都唔知係咪真識…

暫時發現係咁多。

九個月了

尋日，小朗九個月大了，真係唔覺唔覺，仲有少少發緊夢的感覺，有時覺得大肚的感覺好模糊，生的感覺只記得好似痛了好耐，有少少恐懼，其他野已經開始淡忘了，係因為生完冇記性？有太多事要記？定係太專注於小朗的一切上呢？唔知…

呢三日朗朗都陪住爸爸、媽媽見唔同的朋友，佢怕「生保」的個性又出現了，最可憐係星期五，只不過兩個多鐘，見到佢成日扭計，爸爸、媽媽真係要諗下辦法…

星期六，聖記同學大食會，明知要去成日，於是，爸爸、媽媽惟有幫朗朗在vyce姐姐屋企營造家的感覺比佢，哈哈，有佢近期hit點：thomas網床、有波波，仲有小書tim，結果？好d，好d，不枉我們的一番心機，但都好多時要黏住媽媽，佢就係咁架喇，出街就要媽媽，玩野…

今日，契爺來探朗朗，仲帶埋禮物tim，佢竟然唔係太怕，奇怪…可能因為連續三日都見人，開始適應。

唔知點解，今日成日都好想攬住朗朗…

加油呀

好耐冇UPDATE朗朗個BLOG喇，點解？因為而家湊個臭豬好似看牛咁，佢時時都搵野扶住企起身，又成日都以為自己識行咁，扶企後就放手行，哈哈，結果點？咪就係差D跌囉，身為照顧佢的人就唯有時時都STAND BY，準備隨時接實佢，加上佢成日周圍爬，又點會得閒呢？不過唔緊要啦，見到佢一日一日長大都好開心，一齊加油啦！

第四次發燒

臭豬朗真係一粒"渣豆"仔,由出世到而家已經第四次發燒了,第一次係中秋節後,結果:要入院CHECK,嚇親爸爸媽媽；第二次係十一月頭又發燒,到急症室,好彩冇事；第三次就真整"古",因為係爸爸生日,攪到我們求其在香港仔食飽飯,就匆匆切蛋糕,然後送佢睇醫生;今次係第四次,冇特別病徵,只有少少鼻塞,希望佢快D完全好返啦,媽媽星期一就返工喇,我唔想成日都心掛掛......

就因為咁,媽媽的所有願望都係大家身體健康!

大板牙

好耐冇update小朗的blog喇，因為爸爸媽媽太忙…前幾日爸爸媽媽離開香港幾日，好miss囝囝，返來湊佢時，佢唔係好睬我地tim…朗朗，我們冇唔記得你架，去到邊都記住你，仲買了好多好多野比你．

去旅行幾日，婆婆話bb的上門牙終於出來同我們見面，嘩，真係好大隻，好攪笑，佢而家仍然係向前移動，未係100％爬，但又學新野，就係由趴轉坐，好難架，所以唔係次次得，另外，希望佢快d識行啦，因為抱佢出街好攰好攰…

4月5 日小朗第一次坐船，同3個bb一齊去長洲，新體驗。

8個月大

小朗今日8個月大了，尋日見佢第一隻牙更明顯，第二隻在努力冒出來，上排牙已有牙印，但唔知幾時出？？？

佢在不久前，學會了向前移動，點降係移動，而唔係爬？因為我覺得手腳未協調得好，要加油！

佢已習慣食粥仔，一日兩餐好似幾滋味。

會自己坐定定，玩一陣，但好“爹“，要耐不耐攬攬一下再玩，令人好冧！

嘻嘻，仲有好多發現……

終於都屈服

一路以來，我們都唔想比小朗坐傳統的學行車，因為太多報告講它唔好的地方，但實在太多人要求，又見婆婆好似太辛苦，加上前思後想，我們都係咁長大架啦，所以最終都係買左，他又好似好enjoy咁，周圍走，算啦，唯有提婆婆唔好成日坐咁多同咁耐啦…

臭豬隻牙仔越來越明顯了，好期待他出上排的門牙，因為好似兔仔咁，好可愛…

出牙仔 = 忟憎仔??

出牙仔 = 忟憎仔??

細車換大車

眼見小朗呢個冬天坐在架bb車度迫迫咁，爸爸、媽媽實在唔忍心，於是在新年派了好多＄後，再豪一次，幫小朗細車換大車，個sales話可以坐到四、五歲（50磅左右），希望真係可以用耐d啦，不過，我係唔會容許個仔坐bb車出街坐到四、五歲架，因為咁樣太過份喇。囝囝就細車換大車，唔知爸爸、媽媽幾時可以細屋換大屋呢？

新年II

繼續講下囝囝的第一個新年：

年初五：太涷了…冇出過去

年初六：在寒冷的天氣下，小朗著5件衫仔跟坐爸爸、媽媽去tst買玩具，回家洗白白後，又係bb大集會的時間了

年初七：媽媽返工，爸爸獨力照顧小朗大半日，媽媽放工同BB沖涼後，聖記聚一聚

年初八：好hea咁過白天，黃昏出發去公公、婆婆度同一眾親友拜年

就係咁，小朗渡過了第一個農曆年了。哈哈，呢輪朗朗喊的時候，不停地叫爹爹，前排就叫阿爸阿爸，好攪笑！

開心過新年

小朗的第一個新年過得好充實，亦帶比大家好多歡樂…

年廿八，媽咪開始放假，第一次跟媽媽落街買餸準備同爸爸、爺爺的團年飯（今年第三餐），媽咪好耐冇試過獨力照顧bb一整天了，有點吃力，不過都仲可以。

年廿九，爸爸提旱放假，一家人一起到尖沙咀，幫小朗買揀幼稚園的資料、故事書同玩具，爸爸就買大‘褲’大貴，媽媽就買鞋同衫，罕有地大家都有收穫。

年三十，去婆婆屋企食第四次團年飯。

年初一，去太女麻太爺度拜年。

年初二，早上同公公婆婆拜年，同太公姨婆拜年，然後返太女麻度吃開年飯，休息一個下午，再去將軍澳同太公、太婆、舅公、舅婆吃飯，十分忙碌的一天。

年初三，下午婆婆、姨姨同舅父來同小朗玩。

年初四，中午媽媽帶小朗同校長、同事飲茶，然後返屋企爸爸的同事來拜年，好熱鬧！

無聊小發現：綜觀今年的送禮情況，壽桃牌肯定最發，只計我地屋企，到今日為止，已收到七、八份鮑魚麵了，我諗我們可以吃起碼半年至一年。

六個半月了

眨眼間，小朗已經六個半月了，真係過得好快，不過亦仲有好漫長的路要走，星期六家長日個家長先提醒完我要好好為bb計劃第一步，今日爸爸就print了一大疊資料，看來真係要認真地面對呢個問題了…

半歲之後，臭豬食了三四日糊仔，醫生話叫我可以比佢食粥仔，初時，佢食食下就“炆”，到今日，婆婆話佢食了一碗，冇再補奶粉了，都算有進步啦，哈哈，細姨仲話佢學識用飲管飲水，星期五開始我又教識佢give me five，昨日，我攞返佢個大型玩具出來，發現佢可以自己坐，玩一陣，唔…呢一切旁人覺得好微不足道的小事，對我來講都見證著佢的成長，好感恩！希望新的一年大家都繼續健康、快樂！

失敗

今日媽媽專登唔落街食早餐，為了煲粥仔比小朗食，點知…都係唔成功，可能因為水太少，唔夠綿，囝囝唔太喜歡，不過，唔緊要，媽媽會屢敗屢試，到成功為止的。

今日的粥仔唔得，但我專誠到sogo買的日本富士蘋果，小朗就好鍾意，仲食到唔想停tim，哈哈，餵食貓！

六個月大了

今日係臭豬仔六個月大的日子，大家都好期待，雖然今日的節目唔係太豐富，但都好開心！

今日，小朗第一次食糊仔，好滋味，連爸爸試過都話幾香，hehe，餵食豬食得好enjoy！

吃飽後，就同佢著靚靚（件新衫仔係入面，全日冇露面，攪笑！）就出發返爸爸媽媽的母校－SSC，初時，佢心情幾好，一陣後就開始攰喇，其實我一直都覺得佢唔太like出街，每次出街都好cool，在屋企係佢最開心的時刻，不過佢都好俾面，影到幾張笑笑相。

影完後，我們返去婆婆家，等齊人就去香港仔郊野公園BBQ，小朗當然只可以在樹底遠觀啦，唔知係咪郊外環境舒服，佢瞓得特別多，就係咁就過了豬仔六個月大的一日了，好攰，但好開心，我決定即使係攰d，都盡量多抽時間帶佢到戶外行下，因為可以比bb呼吸多d新鮮空氣之餘，又可以比佢見多d野，仲可以比佢落下地學行，幾好！

遊 - 大埔海濱公園

今日朗朗農曆年計是半歲，剛剛好。我地原先帶了佢到沙田的彭福公園玩，不同到了之後發覺太多狗狗，於是轉移陣地到大埔的海濱公園去。仲有 Mon 姐一齊去。

比彭福公園好得多，因為是海邊，又大遍草地，又英式花園，又水池。總之就幾舒服。駕車去都只是二十分鐘左右，可以去多幾次。

朗朗見到草地就好想落地，於是我地就放左佢係草地上面。佢覺得好新奇。

行了兩個小時左右，我地去了 KFC 食 tea. 跟住就返外婆家了。

另外，BB 已經可以係床上面 360 度轉身，又會扶住床邊自己起身，十分危險，真係要睇實一點。

下星期就是新曆的半歲了，要想想怎樣慶祝了。

第四代香港男性湊仔手記

又係清閒的一日.

湊仔生涯已經有五個多月, 不多不少. 等我寫低一些 notes, 比就快 / 有意生 BB 的朋友分享一下. 記住, 這是從男性角度出發, 是主觀的, 不要期望有甚麼科學根據.

1. 開奶當然要先沖水. 經反覆測試, 最理想比例應該是 2/3 開水, 1/3 熱水. 不夠熱的話, 奶粉融不掉. 太熱的話會燙傷 BB.

2. 尿片用過兩個牌子. 已經証明 Pampers 是不好用, 會漏尿的. 而 Huggies 便宜得來是不會漏的.

3. 初生 BB 大便時, 不獨會面紅, 而且屎都是"噴射"出來的. 大家換片時切忌張開口或把面部靠近屁股研究, 否則後果自負. 陳太都中過招.

4. 如果 BB 生奶癬, 就要轉食低敏奶粉.

5. BB 肚餓就會哭, 這是廢話. 重點是, 讓他們多哭十幾分鐘, 奶也會吃多一點, 快高長大.

6. 個人認為玩具錢不要慳. 大人有謂"再窮也不能窮教育", 我就話"再窮也不能窮玩具". 玩具好明顯地能夠刺激 BB 的感觀發展. 尤其是那些有音樂及燈光的玩具.

7. 買玩具不應"越級挑戰". 現在並不是踢英格蘭足總杯, 甲組的 Leeds Utd 把英超的 Man Utd 踢了出局, 沒錯是很威. 不過於 BB 的世界裡面, 我覺得還是循序漸進比較好. 例如,6個月的 BB 玩 12 個月的玩具有如叫中學生寫大學生的 Essay. 12 個月的玩具比較多程序, 又大件, 看來並不適合 6 個月 BB 的認知. 這樣的話, BB 可能由 Step 1 跳到 Step 5. 中間的 2,3,4 就刺激不到了. 每個階段應有不同的刺激範疇.例如初期就是手指的活動, 後期就是手掌的活動.

8. 不要待 BB 累透後才要他們睡. 應該要多加留意, 當他們無反應, 呆呆地的時候, 代表他們已經要睡. 如不立即氹他們去睡, 勢必"發爛炸", 後果自負.

9. 到三個月左右, BB 就會自行戒夜奶. 毋須作任何多餘的安排.

10. 轉食奶粉後, 屎屎又綠又臭, 不用驚訝. 臭到會令人嘔的倒是有點誇張. 戴口罩吧.

11. BB 車是一定要買的. 除非你一心想練大隻. 最好買大一點的, 要不很快就要換車.

12. 又果 BB 不肯食奶咀, 不要迫. It makes your life easier.

13. 吸鼻器是沒有用的.

14. 同 BB 出街最好多帶一次奶粉及一套衫. 小心駛得萬年船.

15. BB 發老脾的時候, 最好用音樂來分散他們的注意力.

16. 最後, 各位兄弟, 你絕對需要一部強勁的 DC 及龐大的 harddisk 作儲存相片及 Video 之用.