壓軸的聖誕禮物

今日係大除夕，我同老公、小朗一齊渡過，雖然我們平淡地在家吃飯，但卻開心囝囝在我們吃飯的時候在我們身邊笑同不停地“bu bu bu”，上年今日，老公一班同事來我們家倒數，大家都期待bb的出世，唔知下年今日又會係點呢？

明天就係新的一年了，希望大家心想事成，開開心心，而我的願望永遠都係大家身體健康！

過去幾日，囝囝令媽媽好開心，因為爸爸媽媽好耐冇試過連續同小朗一齊咁耐，就因為咁，媽媽的工作唔知幾時完成，好彩婆婆29、30號來幫下手，媽媽先叫開始咗少少咋，要繼續努力！

今日，媽媽去銅鑼灣打針，爸爸同囝囝陪埋去，又買多份可能係壓軸的聖誕禮物：一雙鞋比佢，好得意架！點解話係可能？因為敏姨可能仲送多一份比佢，唔知係咩呢？

忙碌的BOXING DAY

今日係boxing day，但由於小朗一早已收晒禮物咁滯，所以只有可以拆anky 姐姐的禮物，但係今日太busy喇，所以等聽日吧。

點解今日咁忙？因為我們終於可以同約咗好耐的渢渢豬見面喇，一早起身，爸爸媽媽同囝囝玩咗一陣，就同渢渢豬約好兩點半tst tea，於是大家就開始忙，幫小朗執下衫、洗下白白、拖地、洗衫、晾衫…話咁快就夠鐘，tst真係十分多人，所以吃完pizza後，逛咗兩逛就去婆婆屋企開party兼慶祝敏姨生日，全日都好熱鬧，不過朗朗仔真係唔like太多人，所以佢唔係“抆”就覺覺豬，冇計啦，出少d去囉，最緊要佢開心。

小朗的第一個聖誕

今年係小朗第一個聖誕節，好開心大家都好錫佢，仲好似好期待送聖誕禮物比佢，一到十二月爸爸媽媽已急不及待買咗個新玩具同小木馬，接著恩姨亦唔執輸，送了個琴比佢，跟住仲有aunt anky的玩具、婆婆公公同敏姨的網牀、爺爺的遙控車，簡直係大豐收，小朗叫媽媽代佢多謝大家，多謝晒！

又講下小朗的第一個聖誕節係點過啦，哈哈，先講平安夜，真係好平安，因為日頭媽媽唔使返工，陪bb留在家，夜晚，我們等爸爸返屋企，依然留在家。到聖誕節，早上，我們吃了早餐後，就趁其他人應該未起身，去吉之島，咁橋遇上大減價，嘻嘻，於是又shop shop shop，梗係shop小朗的物品啦，玩具、網牀、牙膠、飲水杯、果汁……每次都係咁，明明出去前係冇計劃買咩，只想睇下網牀同襪仔，點知襪仔唔靚，買唔到，但就買咗一堆其他野。唔緊要啦，呢d都係要買的物品，加上係普天同慶的聖誕節，豪氣d！返到屋企再陪小朗玩下，咁就渡過了喇，雖然好平淡，但都感覺良好，等佢下年大個d，再同各位一齊慶祝啦！

講開，個臭豬自從尋日五個月大後，就開始重新調整佢的生活，平時三個鐘吃一次奶的佢，尋日可以比我分散佢注意，隔三個半鐘食，今日仲叻，每次都隔四個鐘咁滯，仲要連續兩晚都係九點幾食完奶，十點幾就開始覺覺豬，都幾好，要努力keep住先得！

好長氣呀，我仲想記錄低小朗上星期開始學緊比手手，雖然唔係100％成功，不過效果都唔錯，可惜懶惰的佢暫時左手的反應好d，右手就要提多d，加油啦bb，你好快就學識架喇！

集隊

見差不多到聖誕節，於是就約埋隊長－news及女隊員Michelle來屋企進行集隊，之前，隊長只分別同我們見面，但今次好開心，因為我們終於齊人，哈哈，諗住可以影張大合照，點知硬係有一個zzz，最終，理唔到michelle覺覺豬，都照影一張，集成個「嬲」字，好攪笑。

臨走前，michelle起身同小朗玩，估唔到小朗咁主動，又拖人地隻手又「橋」手咁，好得意，希望下次三個bb可以一齊玩啦！

繼續努力

今個星期，可憐的朗朗第一次要等到星期六晚先返到爸爸媽媽身邊，冇辦法，爸爸要見證傳奇，媽媽要返工至晚上，其實我們都好掛住囝囝架，不過，好彩聖誕節就快到，到時爸爸媽媽就可以陪足囝囝十日，真開心！

今次返來，小朗繼續學轉身，成績都幾好，起碼我們見到佢轉身後識得伸返隻手出來又可以挺起身體，好似冇咁危險嘛，仲有新發現既係佢已經可以一連串咁轉身、伸返隻手出來、挺起身再“突起pat pat”向前學爬爬，努力呀，小朗，你好快會成功架，我們支持你！

開心事

好開心，今晚放工去探小朗見佢好返好多，希望佢快d好返晒啦！

星期日，個傻豬仔雖然有少少唔舒服，但都好貪玩，一瞓係爸爸媽媽張床就趴轉身，surprise的是今日佢趴係度的時候，竟然會伸返隻手出來，有進步！

話咁快佢就來五個月，好快就半歲喇，唔知點解成日都希望佢快d半歲呢？好期待…

記錄

呢個叫得係小朗的成長日記，當然要記錄小朗不同方面的第一次啦，所以我要記下佢上星期第一次成功翻身，其實之前佢都想學，不過我唔想，所以我係唔會協助佢既，點知，個傻豬上星期六及星期日不停地試，不停地學，終於佢成功啦，唔使五秒，佢就自己由仰臥轉成俯臥，唉，呢個係媽媽第一次見到囝囝成功學一樣而未感到開心既，因為我擔心，個豬仔淨係識反身，又唔識伸返隻手出來，而且仲要怕佢覺覺豬時自己反身，煩惱…

今日臭豬有少少咳同鼻塞，爸爸、媽媽商討後，都係決定帶佢去睇醫生，病向淺中醫嘛！

睇燈飾

呢兩日，爸爸、媽媽繼續為小朗搜羅可愛的麵包超人物品，希望小朗見得多可愛的事物，心情開朗d，個樣又可愛d。

星期六晚，小朗第一次睇燈飾，唔知佢鍾唔鍾意，只知佢好有興趣，一天黑，佢就不停望住d燈飾，（因為bb係會留意d光的），影相佢都唔理，攪到我們要不停轉身來就，好彩都影到幾張，唔係特別靚，但都留個回憶，話晒都係第一次嘛。

小發現：小朗呢幾日好似好有興趣學行同學爬，佢企係地下時，會向前踏步，知佢仲好細，都係亂郁，不過都好攪笑，唔知佢幾時先真係學行呢？佢而家pa的時候，除了對腳不停撐之外，個pat仲會突起，個膊頭又向前移，睇來佢係想學爬…

近日，爸爸工作稍閒，便四出為小朗尋找好朋友，一如前文所述，爸爸以麵包超人為小朗的好朋友，於是不斷力努，終於，爸爸幫小朗搵了張麵包超人梳化、外套、遊戲墊、褲仔及飯衣比佢，未知小朗會唔會好開心，但爸爸、媽媽幫佢買了咁多可愛野就好興奮，因為爸爸話小朗似麵包超人喎！

一星期內，小朗連打兩次針（體重7．2kg，身高66cm），希望佢叻仔d，唔好有咩特別反應啦！

今晚，小朗將會同爸爸、媽媽、婆婆、公公、舅父及姨姨第一次睇聖誕燈飾，希望佢唔好掛住覺覺豬啦！

朗朗豬的好朋友 - Anpanman

第三度發燒之無食過一次藥就出院

媽媽忙到甩肺, 等爸爸 update 下.

11/11 係爸爸壽辰, 點知陳小朗又發燒. 唔係太高, 不過都係帶佢睇急症.

例牌檢查, 又例牌送佢入院觀察. 於是爸爸的生日就係醫院度過.

之後住左兩日, 無食過一次藥就出院. 醫生話, 可能都係傷風囉. (Model answer)

依我看, BB 病係有需要0既. 一來發燒會長高, 二來病係有助產生抗體 - 咁樣係積極0既想法.安慰下自己都好.

當然 - 說到底, 邊個想病?

有左呢三次發燒0既寶貴經驗, 以後應該應付自如.

聽日攞把軟尺, 度下小朗有無長高左先.

BBQ

又係happy weekend喇，上星期日係小朗100日大的日子，佢不但冇得嘗不同的味道，仲要可憐地要病住過，最慘的是巧逢爸爸返大陸，咁唯有媽媽去婆婆屋企住兩日，陪婆婆一齊湊仔仔啦，見佢病，真係又擔心，又心痛，所以，我話我以後的願望就係一家人健康。

唔好的事過去了，尋日，我們一家三口去了東涌同各位聖記的姐姐同叔叔一齊bbq，有好多野食，雖然小朗未食得，但睇下都好呀，佢仲同大家玩得好開心㖭，佢好少係咁多人面前玩咁耐架，可能知大家錫佢，加上kevin叔叔咁好人，又接又送，所以比下面。

今次亦係小朗第一次同爸爸慶祝生日，希望佢下年識哼生日歌比爸爸聽啦！

可能尋日玩得攰，佢十點幾一覺就瞓到六點幾，起身個幾兩個鐘又再覺覺豬lu。

多謝姨姨，多謝表哥，今日小朗有新玩具玩．．．

愉快的假期

一連三日長假，當然係同陳小朗一齊渡過啦。

星期六：早上 Judy 姐姐來探訪。今次係姐姐第二次見小朗，第一次係醫院入面。轉眼間，三個月了。下午先出發去護協，join 埋 Icey 姐姐，然後坐巴士入大埔。入大埔係要去探 Mon 姐，因為佢剛剛生左個男 B，係中韓 mix。小朗咁快就做左哥哥了。

星期日，食完早餐，一家三口去永安掃貨。結果買左成九件衫比小朗。之後馬上出發去海港城入面的 Toy R Us。終於都買左個新玩具了。最後就去左中藝買布料，因為太爺要做多件背心比小朗。上次紅色，今次就金黃色。晚上去東海酒家，慶祝太爺生日。

星期一，下午左右，Runway 的同事們到訪，Bobo 仲帶埋九個月大的欣 B 一齊，等兩個 BB 一齊玩下。當然小朗係未識玩0既，不過欣 B 真係幾得人歡喜！下次再玩！

站起來

今晚做了一陣學校野後，就入johnson baby個網望下小朗的發展，睇下睇下，睇到唔知三、四個月大話寶寶開始想站起來．．．令我想起究竟朗朗幾時開始呢個動作呢？幾經辛苦，我終於記得係9月29日，婆婆去飲，媽媽去婆婆屋企湊朗朗時，佢竟然不停用腳撐起，好似學企咁，初時公公唔信， 仲話係我“的”起佢，後來，比佢試下，先發現係真！到而家，我都成日比佢練習，只要佢一有動靜，就比佢撐，好攪笑！唔知幾時先會真係識企呢？

掛念

星期五，朗朗終於出院了，一家都安樂晒。但由於媽媽病了，所以朗朗都唯有留在婆婆屋企啦，可憐的爸爸、媽媽辛苦了成個星期都冇得同囝囝玩，真無奈！

星期日，媽媽好返d，就即刻去婆婆度睇下個囝，好彩，見到佢望到我們個樣都會笑得好甜，個心都好過d！

星期一，因為公公生日，爸爸、媽媽又可以見到小朗，佢比之前叻左，差唔多成餐飯都冇瞓，同我們一齊慶祝，有進步，總算唔係一出街見人就瞓。

星期二、星期三都見唔到朗朗，好掛住佢呀！唔知佢識唔識掛住我們呢？

返工三個星期，朗朗都未試過順利在婆婆家住足一個星期，今個星期一住就要由星期五住到第二個星期六，唉．．．

為了要見證囝囝的每一個珍貴的成長片段，爸爸、媽媽都係時候好好部署將來喇．．．

追月夜，入院夜

上星期日，陳小朗發燒，又咳。於是朝早帶左佢去法國醫院。醫生都唔知咩事，建議入院檢查。

我地想睇多個醫生，於是下午五點幾去到趙長成醫生診所。佢幫小朗驗尿，都係建議入院。佢話三個月以下的 BB 發燒，一定要入院。最驚喜0既係，佢無收任何診金！

落樓之後飛的去廣華急症室，分流追話 BB 細，幫我地插隊，又照肺。最終醫生話留院檢查好呀，安全一點。因為驚係腦膜炎。

上到房，又見另一個醫生，佢又話:「由於兩位咁有經驗的醫生都建議入院，我都要幫你 check 清楚。」

於是，我地決定幫小朗抽血，插喉入膀胱抽尿，仲要抽骨髓。過程有幾痛大家都知啦，聽到佢喊得好勁，真係心痛。人仔細細就要受苦，好無陰公。

所以話，有病的人真係要自己提高警覺先得。BB 仔抵抗力真係好弱。

如是者，我、陳太同婆婆呢幾晚輪流係醫院過夜，好在兩個姨姨都有幫手睇下。因為係醫院過夜其實係無得 sleep 0既。

今日終於出晒報告，無事！不過聽日要去覆診。

不幸地，陳太因為太累所以中左招。又發燒又咳，真係慘。所以我一定唔可以病，雖然我都好攰。

經此一疫，我原本要實行的大計又要順延一星期。莫非係天意？

可憐的朗朗

今星期,朗朗要接受好多挑戰同痛苦,首先,佢要離開出世開始住咗兩個月的屋企,適應新的寄宿生活,雖然係婆婆屋企都有好多人錫,但畢竟都要離開爸爸媽媽嘛,都會有D唔慣(其實更覺得唔慣的是爸爸媽媽),好悽涼啊!其次,佢仲要開始吃奶粉,我唔知兩者比較味道如何,但食的感覺就好唔同,我諗...會少咗一份親切的感覺.最後,年紀小小的朗朗一星期就要比人拮兩次,拮完左腳拮右腳,一支針的反應完咗第二支又來,好彩佢都唔係十分怕痛,如果唔係,見到佢不停為打針痛而大喊,我真係陪佢痛埋一份......

倒數中

仲有一個星期，就要返工。

仲有三日，囝囝就要搬去婆婆屋企。

好唔捨得．．．唔捨得個超級悠長的假期，更唔捨得可以時時見到朗朗的日子．．．唉．．．如果可以中六合彩巨獎問題就可以解決喇．．．

跨區食好野

今日帶住朗朗跨區去到 CWB 食好野。

無錯，呢樣好野叫輪狀病毒，要成七百幾大元一支。堪稱 BB 界中之大補品。

聽聞食好野又俗稱“食甜甜“。我問醫生輪狀病毒真係甜0既？佢話未試過，不過應該係。

但見陳小主食得津津有味，眼都唔眨，我相信最起碼唔會係苦0既先。

醫生又話陳小朗塊面生奶癬，要轉食低敏奶粉，又要搽藥膏。唯有暫時轉食“能恩”。

跟住去了 Toy "R" Us 行了一陣，就番左屋企。

學習

星期三下午，媽媽一個人坐係度諗：點解我咁唔得閒？諗來諗去，我一日瞓醒的時間有七成以上係抱住囝囝，一有時間就要做家務，結果係不停地湊仔＆做家務，連食飯都要趕住，咁既生活好似唔係好得，再加上爸爸的一句慈母多敗兒，仲有，個幾星期後婆婆亦唔能夠用咁多時間去湊住囝囝．．．種種原因，我決定要學習忍心，等BB習慣下唔係媽媽懷抱裏面瞓覺的感覺，過程中，佢真係不停喊，好可憐咁，不過喊了一陣後，（時間係一陣，但睇住佢喊就覺得好耐）佢又真係會停落來，如是者，經我一日的訓練後，朗朗尋日開始就可以比我放佢在搖籃度等我搖住佢就瞓著，瞓的時間仲同我抱住佢差唔多㖭，唯一唔好就係佢要食住奶咀先瞓到，冇辦法啦，慢慢再調整。有時候，我諗其實撇開安全感之後，瞓在床應該比比人抱舒服架，大人抱住的時候，BB成日都好似要縮埋一舊咁，舒服咩？

今日，爸爸話在yahoo新聞見到有個十九日大的BB感染豬流感，好慘！其實，我都有d擔心，BB咁細，抵抗力一定冇大人咁強，呢個就係我咁辛苦都堅持餵母乳的原因喇，同時，我亦覺得更重要的是人的自律，如果病就唔好接近d細路啦，唔好以為少少病ok，你點知d菌有幾強？梗係小心d好啦。

新生活

由九月一日開始，朗朗同媽媽嘗試過冇婆婆幫手的新生活 ，起初，我真係十分擔心，唔知自己做唔做得來，又怕會好似好悶咁，好彩，都尚算順利，不過就忙到不得了，成日要計劃如果朗朗今次覺覺豬要做d咩，仲要係靜靜地，唔可以嘈醒佢，因為佢、痴′身不特止，仲遺傳埋媽媽的醒瞓，所以我每次放低佢做野都要九秒九咁，極速完成，攰就攰d，都冇辦法啦，夜晚早d休息囉，已經好耐冇試過十點後瞓喇，我可以咁做係因為爸爸肯接力，爸爸照顧囝囝的功力都不斷進步緊，睇來對住呢個小朋友我們有排忙，正因為咁爸爸媽媽都好似瘦身咁，我好快就可以去返生之前的體重喇！

過多兩個星期，我們又要過返工後的新生活喇，到時婆婆仲辛苦，因為又要湊朗朗，又要照顧舅父仔，仲要買餸㖭，真係辛苦晒！今日睇報紙見到陳慧琳第一日復工，因為怕唔捨得個囝喊，我驚第日返工我都會忍唔住日日返外家睇下個囝，我諗一定要一段時間先適應到。

自從囝囝出世之後，發現生活有好大的變化，雖然多了d家庭的溫馨感覺，但真係少了很多自由，最明顯的就係因為阿囝太細，好多地方都唔想帶佢去，希望佢快d大啦，唔使多，一歲左右可以推住架車帶埋佢周圍去就夠喇。有時諗返BB係我個肚裏面一日一日成長，個肚一日一日脹大，最後成為一個人仔，個感覺真係特別，仲好奇妙，好似發了場夢咁，在剎那間就做了媽媽，真係唔識形容。anyways，都係開心嘅。

行街街

星期日，係婆婆休息的日子，媽媽同爸爸唯有去邊都帶埋朗朗去，於是，朗朗就跟我們一齊去樓下食早餐，然後就坐住佢個小car seat出發去海港城，唔好誤會，我們係去睇BB野咋，唔係大人shopping，結果都只係在mothercare買咗少少野，最重要係買咗個成日比唔同的人都叫我買的奶咀，雖然我本人唔太想買，但成日都講，就即管買來試一下，效果未知，不過佢個樣就好攬笑，行完海港城的兒童世界，就搭巴士返屋企lu。

事後感想：雖然第一次同囝囝出街都尚算成功，但都深深明白到如果一個人帶BB出街係超辛苦的，所以，要同朗朗出街都係一家人去好。

對爸爸的支持

今早起床，正當媽媽鍡朗朗食奶的時候，爸爸話今日返公司可能會有d唔開心的事發生，媽媽就話平常心對待啦，說罷，爸爸就出去梳洗，再返房的時候，媽媽幫朗朗換片，朗朗瞓係度，望住爸爸，我就幫朗朗講bye bye爸爸，點知朗朗就配合媽媽同爸爸笑，仲笑到好似e起棚牙咁，哄得爸爸幾閞心，雖然朗朗成日蝦爸爸，要爸爸抱住行街街，但佢其實都好錫爸爸，之前就成日係爸爸起身返工的時間起身食奶，好似想叫爸爸起身同見多爸爸幾面咁，而家又成日同爸爸笑，今日仲較好時間，同爸爸打打氣，幾孝順！

大豐收

呢幾日都有客人來探朗朗，尋日媽媽的舊校長來睇BB，送咗個好得意的籃球架比佢，雖然佢未玩得住，不過我相信佢會好鍾意的，真係好有心！第二份禮物係由兩個姨姨同Ant哥哥送的printer，好合用呀，多謝晒！爸爸返屋企仲有第三份禮物，就係Adidas套裝，拼落朗朗身上，好有型，多謝爸爸的朋友！

其實，由朗朗未出世開始已經收咗好多親戚朋友的祝賀同禮物，多謝各位！等朗朗大個d，我會同佢講架，等佢自己多謝你們啦！

第一次慶祝生日

今日帶囝囝去健康院打針，一如以往，去到第一件事就係磅重，咦，原來囝囝由出世到而家都重咗差唔多兩磅，之後，同佢打針打大腿，佢嘩一聲喊出來，好悽涼呀，睇住佢人仔細細要打針，好似特別痛咁，不過佢喊咗幾聲就冇事喇，我同佢講；男仔要堅強d，唔怕，隔離個媽媽好奇怪咁望住我，嘻嘻，我真係當個仔識聽咁架，唔理咁多，咩都同佢講，佢幾時識聽，幾時明就可以即時接收嘛！

今晚，囝囝會第一次同人慶祝生日，希望我們切蛋糕同吹蠟燭的時候，佢唔好瞓，可以一齊參與啦，我代朗朗預祝AUNT VYCE生日快樂！

出世後的日子

不經不覺，朗朗以農曆計算已一個月大了，趁佢而家瞓晏覺，就記錄一下呢個月的生活啦．．．

7月24日；囝囝出世
7月26日：因有點黃，所以開始照燈
7月28日；終於可以出院，第一次返屋企、第一次瞓自己張床．．．
7月31日：第一次到健康院檢查
8月3日：第二次到健康院見醫生，但有點黃，要約下星期再檢查
8月10日；第三次到健康院檢，醫生話情況良好
8月15日：爸爸、媽媽幫囝囝領出世紙，從此BB個名叫陳澔朗，Antares，趁此機會，爸爸、媽媽幫BB買BB車及car seat，仲有兩套靚衫仔㖭
8月18日：由於要避開農曆七月，所以囝囝的彌月宴提早在金龍船慶祝，怕醜的朗朗成晚在佢架“列火戰車”度瞓覺，唔肯同人玩
8月22日：朗朗農曆滿月，婆婆提議帶佢去飲茶，就係咁，囝囝第一次去茶樓，佢著住姨姨送嘅水手裝，加埋對白襪仔，好似個學生哥咁，好可愛！在茶樓，我們飲茶，吃點心，佢就唔執輸食埋一份，不過係食奶奶。第一次去飲茶的茶樓係屋企樓下的新星，仲有呀，囝囝今日仲第一次著褲仔㖭，好攪笑

天蠍座的心臟

小豪子終於在 7 月 24 順利誕生。最大的功勞當然是歸於我的好老婆陳太了。

生產期間的心路歷程留待陳太細述。反而我想約略解釋一下小豪子洋名 Antares 的意義。

Wikipedia 是這樣說的:

Antares' name derives from the Ancient Greek Αντάρης, meaning "(holds) against Ares (Mars)", due to the similarity of its reddish hue to the appearance of the planet Mars. It is the brightest star in the constellation Scorpius. Its distinctive coloration has made the star an object of interest to many societies throughout history. According to ancient Arab tradition, Antares is the warrior-poet Antar's star[citation needed]. Many of the old Egyptian temples are oriented so that the light of Antares plays a role in the ceremonies performed there.

Antares 即天蠍座中最光亮的星星，中文名叫「心宿星」，代表天蠍座的心臟。小豪子老豆本人其實就係天蠍座。換言之，阿子就等於我的心臟，即係命根。係咪好 meaningful 呢？

好多朋友亦都問點搵出來。查實最初只係想睇下有無一些希臘神話入面的名是適合的，因為我覺得入面的名會比較特別。誤打誤撞之下，就搵到 Antares 呢個名了。

如果要知點讀，請致電給陳氏家族查詢。

小豪子的誕生

期待咗三十九個星期,小豪子終於在2009年7月24日出世了.（小聲明；呢篇係長篇大論的網誌，用來記錄囝囝的出生歷程，會好長同有d悶架，但我好想寫低第時同囝囝一齊分享，所以．．．有興趣就慢慢睇，冇興趣就bye bye喇。）

雖然身邊的親朋戚友對BB的生路歷程都略知一二，但這既然是小豪子地球之旅,當然要記錄一下整個過程啦.話說在2009年7月22日的凌晨, 瞓得唔好的我見有d肚痛，就諗住去下toilet，睇下有冇咩發現，咦，好似有少少唔妥喎，但未肯定，於是抱住囉囉“luen”的心情再等，一個鐘頭後再去睇，又再似d，為了進一步確定，便漏夜睇下本懷孕秘笈，睇完之後都仲係懷疑，好唔容易先等到六點幾，呢次發現．．．係傳說中的見紅喇，就同陳生講，然後再執整下個走佬袋後，便由五叔車我們到廣華醫院了。

哈哈，去到廣華，差d過唔到體溫檢查，又飲水，又要再三探熱先可以上到病房，一輪檢查後，都知有排等，於是叫老公買咗早餐一齊食後，就叫佢返屋企等，我就返病房開始我的陣痛歷程了。

7月22日：由於早上同下午都只係得零星的陣痛，醫生仲話如果冇特別，第二日可以出院，心諗；真係食詐餬，有點不快，但在堂姐的提點下，我在走廊不停來回行呀行，終於在探病時間開始幾痛，慢慢仲有d規律，在晚上十點後十五分鐘一次，十二點後十分鐘一次，每幾分鐘瞓一覺．．．好攰。

7月23日：早上七點幾醫生巡房，我急不及待同醫生講呢個“好消息”，原來已經開了兩度，於是我又再努力行走廊，等進一步發展，到早上十一點幾，我終於三分鐘痛一次喇，護士就將我轉到產前房，當大家都一心以為7月23日係囝囝出生的日子，點知貪玩的囝囝在轉房後，又唔想出世住，陣痛又再唔規律，不特止仲疏咗tim，唉，究竟囝囝幾時先出來架？眼見身邊的準媽媽一個一個被推入產房，而我只有等同痛，仲要見到老公頻頻撲撲，又擔心，令我更心急。唔記得幾時開始，我痛的程度有八級，坐又痛，企又痛，行又痛，瞓都痛，成日廁所又去唔到，野又食唔落的我開始心存放棄的念頭，心諗一次就夠晒數。雖然好辛苦，但我在過程中都有得著的，就係第一次感到咁多親友的關心。（嘔心都要講句；多謝老公的支持，因為我知佢好擔心，見佢一次又一次在我冇諗過的情況下走到醫院陪我，好感動。）到黃昏，痛的程度有九級，在陳生的見證下，痛的頻率由五分鐘改為三四分鐘，姑娘仲係話未夠，我開始明白點解人地話生仔的痛係無法形容，但戲“肉”仲未到，到九點幾，醫生巡房，話如果騼日仲係痛得咁疏就傕生，我即刻攞電話準備打比老公，點知一出到大堂，佢已經企係度，我仲同佢講依醫院的一貫作風，起碼24日下午啦，咪叫佢第二日下午先請假囉。

7月24日：九級的痛維持到凌晨，兩三點的時候九級半的痛來臨，我條腰骨痛到不得了，真係想死，直頭諗可唔可以時光倒流，我唔生了。到四點幾醫生巡房，話我開到三度，下，咁先得三度，幾時先到十度？但由於佢懷疑我已穿水，所以即時同我插喉催生。天真的我以為真係好快生得，點知等呀等，冇幾耐十級痛到喇，便急的感覺真係好好好難受，我由半夜開始忍唔住嗌，到早上我已開始瘋顛了，我唔相信個個係自己。捱到八點，終於有九度，醫生話可以入候產房，我又一次天真地以為可以生，入到去原來要等十點醫生再檢查，但我已經完全失控，無論醫生、護士點叫我唔好用力，叫我深呼吸同聞止痛氣，我都好似聽唔到咁，不停話唔得，最終，我由入待產房開始，就唔識死地用力，連照顧我個阿嬸都頂我唔順，話你生到我一定幫你接，到九點幾，佢話相信我已距離十度不遠，差不多到十點，佢即刻幫我搵醫生，但醫生未來得，佢見我咁心急，就教定我到時點生，十點鐘，助產士來到，見我已見紅，就立即穿上保護衣幫我生，結果花咗三十幾分鐘就生了個八磅BB喇。生完之後，第一件事就係想打電話，因為爸爸仲未知囝囝出世架嘛，但要等聯針、BB磅重、檢查．．．等，結果係．．．一出產房竟然見到爸爸在產房門口企咗係度，原因係佢見我成朝冇打電話比佢，所以忍唔住來睇下。呢個消息一經發放，嘩！來探BB的人不絕，好誇張，可憐的爸爸只可以行來行去、派下口罩咁，見BB的時間係十分少的，不過唔緊要啦，咁多人錫BB都係好事來嘅。

就出了!!!

就出了!!!

繼續期待......

今日又去廣華檢查,冇咩特別,同平時一樣,比醫生度下肚,

佢話佢的<臨床觀察>覺得BB冇dr Law講得咁大,可以放

心自己生,其實我一直都冇擔心係自己生定剖腹生,因為

對我來講,安全同順利先係我Concern的,不過,我在諗

把軟尺都幾犀利,可以度到BB有幾重?!

繼續期待BB的出世......

最後一次產檢？？？

本是星期六去覆診，點知今朝打開電腦 check 到星期六可能打八號，於是唯有即刻改今日了。

超了超聲波，Dr. Law 話度唔到 BB 幾重，因為已經爆磅。總之就 over 3.5 KG。

佢都 suggest 我地去開刀。如果這兩日都未出世就會難生 d。

臨走前，Dr. Law 又預祝我地順順利利。

唔通真係到打風個日先出世?

期待

今日又係去廣華檢查的日子,一如以往,用個幾兩個鐘等見醫生3分鐘同驗小便,唔...今次抵D,因為抽埋血,冇辦法啦,都明白公立醫院係咁架喇.今次依然係冇新驚喜,每次惟一期待的都只係聽下BB心跳.不過,由於上星期聽講個舊同事自己生咗個9磅幾的BB,唔使開刀,所以好奇下,就問下醫生幾多磅的BB先要開刀,佢話要4KG以上先會,啊...我諗我點都冇啩.講講下,我話佢知兩星期前BB的重量,佢有點愕然,話個肚又唔大喎,仲問我幾時再去私家醫生度Check,叫我照完比張片佢睇,哈哈,點解佢唔自己幫我check呢?身邊d朋友去政府醫院檢查,見佢地的bb可能有d大都會幫佢地check,但呢度反而叫我check完話佢知,都幾得意,好彩,我有睇開私家醫生je.好啦,惟有一邊期待BB快D出世,一邊等待星期六的產檢啦!

「奶樽保齡球」

難得一日假期，當然要好好休息一下之餘，亦都要善用時間。所以我地決定整理一下 BB 的東西。

整整下，原本亂到九彩的 storage room 終於似番間房，起碼我都可以行到入去。

之後就係戲肉 ----- 奶樽。

玩左一陣「奶樽保齡球」之後，我地將奶樽放入去個煲入面蒸左十幾分鐘，主要其實都係消毒。趁現在仲有時間我都想砌埋張床，不過都係被嘉燕媽媽阻止左。

今日又去左買定幾 pack 即影即有菲林準備影 BB，順便幫 Auntie Vyce 睇下有無寶麗來的菲林。結果都係無的。而另一個發現就係 Fuji 出了部新的 Instax 210。早知我等多兩個月先買啦。

小鞋子

話咁快，小豪子已經預先擁有三對小鞋子。

阿爺已經急不及待買左一對「愛迪達」，另一對就係佢上網訂的 AC/DC (穿左之後會否成為怒 B??)。

另一對係我係 babyGap 買的。

希望小豪子聽日出世。

「烈火搖籃」

剛剛收到契媽送比囝囝的禮物 － High Chair，又稱為「烈火搖籃」。

除了比想像中要大件，原來一張看似簡單的坐椅，內裡竟然機關重重。

拿起說明書，一邊摸索一邊試用，連綠茶也過來湊熱鬧。

十幾分鐘後，終於征服了這件新玩意。自我感覺良好。

確定了

昨日,我們去了醫生度超聲波,主要想清楚兩大件事:
1.BB個頭係咪真係調咗,結果:已經調咗,仲已經好低tim
2. 係咪會照醫生先前所講,早兩星期呢?結果:醫生好幽默咁話你作動個日,就係你生個日,哈哈,我都知.不過感意外的是醫生話BB好似有D大,再係咁落去,足月的時候可能有8磅,下?唔係啩......有少少擔心.希望一切順利同平安啦.

另外,陳生昨日作咗好難的決定,我好明白你的處境嘅,辛苦晒,我知爸爸都係好偉大架!

終於等到喇

星期一:廣華覆診,去到的時候,第一個感覺係:唔係啩,多人成咁,冇位坐要企的準媽媽超過十人,於是護士姐姐就發出廣播,請陪伴的男士讓座.其實,係個度等真係有d難受,又多人,又焗,仲有個中年婦人好大聲咁講佢的經歷,令人煩上加煩,悶上加悶.

終於,等咗個幾鐘,可以見醫生喇,依舊係摸兩下,再度一度,然後再聽埋心跳,ok,兩個星期後見,我等咗咁耐,梗係要問下個BB而家的情況,調咗頭未啦?醫生的答案係:呢,咪調咗囉,個頭在下面架喇,你唔覺得成日想去小便咩?坦白講,我真係唔覺,好似同平時冇咩分別......Anyways,都應該係個好消息啦,不過,為咗讓陳生可作出唔出trip的決定,我已book咗醫生聽日再check清楚個情況(當然,我一定唔想佢去啦,不過,我明白同尊重佢的決定嘅,聽日先算啦).

另外,一個貪靚的準爸爸早前在網上訂咗兩件佢的至愛球隊:曼聯的BB衫,尋日,終於收到喇,個件冬天的外套確係幾得意,攪笑的佢,仲望住件衫仔同我講:你叫你個妹千萬唔好訂利物浦D衫比BB,以免混淆.真好笑...

太感動了！太有心了！

囝囝差不多要出世了，將為人父，確是有點壓力。不過近來公務繁忙，也沒有太多時間去想太多。

今日真係作出後衝刺了。去旺角買了一部空氣清新機，一部風扇，及一個溫度計。

為了囝囝，這陣子屋內已經添了很多大大小小的物件。保守估計，買下買下可能已經用了一萬多了。

四百萬一個，原來係真的。

回到家收到契媽蕭電話，他們二人要送張 High Chair 比囝囝，實在太感動了！太有心了！多謝晒!

陳太聽日去醫院覆診。而我，仍然未決定是否要上大陸…

最後衝刺

今朝一早起身執拾一下昨天洗的BB衫，之後就去聽同我最有貼身關係的《分娩的認識》講座，廣華的內容似乎比之前在仁安聽的內容充實D(唔知係咪因為知大日子將至，所以有咁嘅感覺呢？)，聽完覺得媽媽真係好偉大，十月懷胎已經唔係件易事，仲要承受咁多個鐘頭的痛苦......令我有少少驚tim。

聽完之後，返屋企等陳生放工就去舉行緊“震撼大減價”的永安百貨，去之前我們都唔係抱好大期望，因為大家都總覺得永安唔太似係呢個年代咁，不過講到咁抵，都去碰下運氣啦，結果......都ok啦，買咁張Shinkansen包被、毛巾、BB衣架同超值Thermos保溫套裝......等，而家一定要在出世前買嘅物品就八八九九喇，等買埋探熱針就差唔多，good！

第一次洗bb衫

雖然天文台正懸掛一號風球，但見都有d陽光，於是決定洗bb的第一機衫，前晚開始將bb的新衫仔剪牌、拆袋，發現都唔少，但硬係就好似“差”d未夠咁，不過，唔緊要啦，見到再買啦。等一陣洗完就第一次晾bb衫，感覺到大日子好似越來越近，開始期待......在期待的同時，我都要加緊努力，快d完成學校的工作，加油！

過戶

尋日中午左右終於走左去 Cally 屋企，因為佢有好些 BB 用品可以過戶比我地。

見到佢，嘩，原來都幾多物品。衫仔褲仔奶粉咩都有。其中仲有一張搖搖安樂椅，不過要等小豪子大小小先用得。

不過今次真係多謝 Cally，仲有就係 May 的大袋衫仔。

覆診

下午放假，同陳太去中環覆診兼照超聲波。去之前順道去 H&M 買了一件衫比 BB。

BB 暫時仲未轉身，個頭未向下。所以羅醫生話可能最終要開刀，除非個頭轉番落下邊。

跟住再去多次護協買下奶樽等，亦都買多張床。

如是者，也買得差不多了。仲有 BB 車同搖籃未買。

傳說中的護協

放工後終於去了傳說中的護協走一趟，與教協不一樣，那是處於比較偏僻的佐敦。

上到去，入門口之後已經覺得迫，原來這裡的面積比我家只是大了一點。裡頭人山人海，擠得水泄不通。奉勸各位還是 week day 去比較好了。這比起行年宵實在好不了多少。

幾經辛苦我們血拼了一會，大概也有一小時左右，收獲都算豐富。除了若干雜貨，最主要的是買了個消毒鍋及吸乳器。

另外又查閱了一些床，可能會買給婆婆那邊的。

最搞笑的是，我們回家不久，契媽 Siu 即打電話來問：「你地買左個消毒鍋未?我見到有 promotion 想買個送比你地!」

..................

如是者，契媽 Siu 可以考慮下送第二樣啦。WaHAHA。

全天候四輪 360 度轉向

今日 B 哥話有部 $300 的 Baby Car，不過我地覺得始終無見到實物，無得試，好難買的，最後都無買了。

查實我地已經睇中左，就係 Combi 的全天候四輪 360 度轉向 Miracle Turn!

同事講起 BB 英文名，又係度話我搵的那些不知道是甚麼意思，又話唔識讀。

於是今晚特登用了一晚再挑，開了個新投票榜，有埋解釋，無藉口話我啦吧。

大家又投下吧。

子宮號太空船

好了，今天終於有時間搞這個 blog。這是很久之前應該做的事情。

大家都知道小豪子就快坐子宮號太空船降落地球，而不少朋友都貴人事忙，把預產期忘了。太空總署現鄭重再宣佈一次 ------ 子宮號將於七月三十日進入地球範圍。

現階段，請各位嘗試幫忙於左方的投票欄投下神聖一票。因為到現在還未有想好名字。中文名字就不設投票了，反正到頭來你們都是鬧爆的。

年輕夫婦現在陸續為小豪子購置裝備。床、衫、鞋、即影即有影機、浴盆等等。遲些可能要添一間新屋，要不然東西要放到出門口去。在這裡亦預先多謝各朋友同事已經還將會贈送的物資 ----- May，Bobo，Cally，契媽 Siu 的衣服。鄧生的教育基金。Kate 的每月一包尿片。同事們的 BB 車。凡此種種，不作詳列。總之就是萬分感激。

等待，總教人期待。在此我先要多謝的就是陳太。懷胎十月殊不簡單，你的辛若我是知道的。加油！我們距離終點已不遠。