學習

星期三下午，媽媽一個人坐係度諗：點解我咁唔得閒？諗來諗去，我一日瞓醒的時間有七成以上係抱住囝囝，一有時間就要做家務，結果係不停地湊仔＆做家務，連食飯都要趕住，咁既生活好似唔係好得，再加上爸爸的一句慈母多敗兒，仲有，個幾星期後婆婆亦唔能夠用咁多時間去湊住囝囝．．．種種原因，我決定要學習忍心，等BB習慣下唔係媽媽懷抱裏面瞓覺的感覺，過程中，佢真係不停喊，好可憐咁，不過喊了一陣後，（時間係一陣，但睇住佢喊就覺得好耐）佢又真係會停落來，如是者，經我一日的訓練後，朗朗尋日開始就可以比我放佢在搖籃度等我搖住佢就瞓著，瞓的時間仲同我抱住佢差唔多㖭，唯一唔好就係佢要食住奶咀先瞓到，冇辦法啦，慢慢再調整。有時候，我諗其實撇開安全感之後，瞓在床應該比比人抱舒服架，大人抱住的時候，BB成日都好似要縮埋一舊咁，舒服咩？

今日，爸爸話在yahoo新聞見到有個十九日大的BB感染豬流感，好慘！其實，我都有d擔心，BB咁細，抵抗力一定冇大人咁強，呢個就係我咁辛苦都堅持餵母乳的原因喇，同時，我亦覺得更重要的是人的自律，如果病就唔好接近d細路啦，唔好以為少少病ok，你點知d菌有幾強？梗係小心d好啦。